Çand,Hûner,Zimanê Kurdî

Encamnameya Konferensa Parastinazimanê Kurdî
 

19 Sermawez,2006 weşandin:11:03:22 (GDK)

Konferensa Parastin û Perwerdeyîya Zimanê Kurdî ku di çarçoveya 4emîn Rojên Wêjeyê li bakurê Kurdistanê li Diyarbekirê, di navbera 18 û 19 ê sermawezê de bi beşdarîya 150 delegeyan pêk hat.
Konferens ji alîyê şaredarîya bajêrê mezin a Diyarbekirê û bi piştgirîya sazîyên ku xebata parastin û pêşvebirina zimanê kurdî dikin ve hate li darxistin.

Encamnameya Konferensa Parastina Ziman

- Di konferensê de hate destnîşankirin ku meşandina polîtîkayên pişaftinê sûcekî mirovayî ye. Lewre ev polîtîka ji hêla beşdarên konferensê ve hat şermezarkirin.

- Ji alîyê beşdarên konferensê ve hate destnîşankirin ku divê siyasetmedarên kurd siyaseta xwe bi zimanê kurdî bikin, lewre bang li hemû sazî, dezgeh û siyasetmedarên kurd hate kirin ku siyaseta xwe bi zimanê kurdî bikin.

- Beşdarên konferensê bal kişandin ser çavnebarîya li hemberî zimanê kurdî û ji ber bi karanîn û handana zimanê kurdî pest û pêkutîya li ser şaredarîyan şermezar kir.

- Delagasyona konferensê, pêşinyar da Hukûmeta Herêma Kurdistana Federal ku li herêma Parêzgeha Duhokê û derdora wê - ku zaraveyê kurmancî lê tê bi karanîn - perwerde bi zaraveyê kurmancî be.

- Beşdarên konferensê dîyar kir ku mafê ziman û çandeyê mafekî navneteweyî û demokratîk e. Li ser vê bingehê beşdarên konferensê bang li kurdên Turkiye, Sûrya û Îranê kirin ku li mafên xwe yên çandeyî û ziman xwedî derkevin.

- Beşdaran destnîşan kirin ku ji bo pêşketina ziman mercên aştî û aramîyê pêwîst in. Ji bo vê yekê jî konferensa me bang li hemû derdorên têkildar kir ku ji bo pêkanîna mercên aştîyane barê ku dikeve ser milên wan pêk bînin.

- Beşdarên Konferensa Parastin û Perwerdeyîya Kurdî astengkirina televîzyon û weşanên kurdî yên mîna Roj TV, MMC û Komala TV wekî binpêkirina mafên mirovan û astengkirina zimanê kurdî dibînin û vê yekê şermezar dikin.

- Di warê fêrkirin û perwerdeyîyê de divê ku alîkarîyek taybetî ji bo kurdên Armenistanê û Başûrê Rojavaya welat, re bê kirin.

- Beşdarên konferensê bang li sazîyên sivîl û demokratîk ên li hemû herêmên ku kurd lê dijîn kir ku têkilîyên xwe yên civakî, çandeyî, hunerî û aborî xurt bikin da ku zarave û devokên kurdî ber bi hev ve werin û nêzîkî hev bibin.

- Di konferensê de giringî û pêwîstîya Tevgera Ziman ji bo parastin û pêşvebirina zimanê kurdî hate destnîşankirin û bang li hemû gelê kurd hate kirin ku bi hemû îmkanên xwe ve beşdarî xebatên Tevgera Ziman bibin.

- Konferensa me bal kişand ser giringîya jin û ciwanan a di parastin û pêşvebirina zimanê kurdî de û xwest ku jin û ciwan ristekê bi taybetî di parastin û pêşvebirina zimanê kurdî de bigirin ser milên xwe.

- Konferensa me gihişt vê encamê ku teknolojî heta niha ji bo pişaftina zimanê kurdî hatiye bi karanîn. Beşdaran xwestin ku gelê kurd di parastin û pêşvebirina zimanê kurdî de bi awayekî xurt ji teknolojiyê sûdê wergire.

- Konferensa me rojanebûna rojnameya A. Welat wekî gavek dîrokî bi nav kir û xwest ku gelê kurd bi her awayî li rojname, kovar û weşanên xwe xwedî derkeve.

- Her wekî di konferensa par de jî biryar hatibû girtin, konferensa me pêşinyar da Hukûmeta  Kurdistana Federal, da ku gav bi gav ber bi serdestkirirna tîpên latînî ve biçe.

- Konferensa Parastin û Perwerdeyîya Kurdî bang li rewşenbîr û akademîstên kurd kir ku bi zimanê kurdî berheman bidin û li ser zimanê kurdî xebatên zanistî bikin.

- Beşdarên konferensê bang li dewletên ku kurd hemwelatîyên wan in kir ku hebûna zimanê kurdî nas bikin û ji bo parastin û pêşvebirina zimanê kurdî budçeyekî taybetî veqetînin.

- Her çiqas li ber zimanê kurdî hinek asteng hebin jî, yên ku zimanê kurdî biparêzin kes û saziyên kurdan in. Tiştê giring ev e ku kurd û kesên ku xwe kurd dihesibînin, berî her tiştî di jîyana rojane de, di dan û standinên bi her awayî de, zimanê xwe bi kar bînin.

Hemû mafên nûçe û nivîsên ku destnîşana HAWARDENGÛBAS hatiyê danîn ser navê Hawar Kurdistan Media Group ya HAWARDENGÛBAS e.Beyî destûr naye bikaranîn.

Binivsîne  |  Biçe Jor   

Hemû Naveroka Beşa Çand û Huner

irêdan