Cîhan

Bûyereke Dawî ya Terorîzma Faşîstên Tirk; "Hrant Dînk Hate Kuştin"

21 Rêbendan,2007 weşandin 07:34:39 (GDK)

HAWAR-DENGÛBAS,Faşîzm û Terorîzma Tirkan beramberî Kurdan û neteweyên din herî dawî jiyana Hirant Dink girt.

Kujerê Hrant Dink îro ji aliyê bavê xwe ve hatibû gilîkirin. Piştî ku bavê wî agahî da polîsan, polîsan bav û çend kesên din girtin bin çavan. Piştî demeke kin jî Ogun Samast li Samsûnê hate girtin.

Rojnamevanê Ermenî ya bi navûdeng Hrant Dînk ku derbarê wî de bi îddaya “heqeret kirina Tirkbûnê” doz hatibû vekirin roja Şemîyê katijimêr derdora 15:50'an de di encama bûyereke teroristî de hate qetl kirin.

Hrant Dink li pêşiya rojnameya Agos ku gerînendeya giştîyê vê rojnameyêye ji aliyê kesekî nenas ve hate kuştin.Dînk, bi 3 guleyên ku ji sîng û serê xwe xwar, li cîhê buyerê can da.

Şahidên buyerê diyarkirin ku êrîşkar kesekî temenê wî di navbera 18-19 salî de bûye û bi kum û montê spî bûye.

Kujdara Hrant Dink ji alîyê kemaryên ewlehîyê ve hate tespît kirin û piştî bûyerê 2 kes hate binçav kirin.

Piştî kuştina Hrant Dînk bi hezaran kes ber bi cihê kuştina Hrant Dînkê ve çû.Piştî saet 20.00'an bi hezaran kes li qada Taksîmê ya Stanbolê kom bûn êrîşa hovane bi dirûşmên "Dewleta Kujer","Em Hemû Hrant Din'in","Em hemû Ermenî ne" û "Bijî aştî û biratîya gelan" şermezar kirin.

Piştî vê suîkastê hemû rayedarên dewleta Tirk daxûyanîyên şermezarîyê li beramberî kuştina Hirant Dink weşandin.

Serokwezîrê Tirkiyeyê R. Tayyîp Erdogan destnîşan kir ku bi tu provokasyonan Tirkiye ji riya wê nayê derxistin û anî ziman ku dê reformên demokratîk dom bikin.

"Em hemû Hrant'in!"

Li Mêrsînê nêzî hezar kesên li hev kom bûn, heta ber Cemiyeta Rojnamevanan a Mêrsînê meşiyan û qetilkirina Gerînendeyên Giştî yê Rojnameya Agos Hrant Dînk şermezar kir. Dema kom hate ber avahiya cemiyetê, kevokên li meydanê firiyan.

Endamên KESK, TMMOB, TTB, DÎSK û Yekîtiya Hekimên Diranan a Tirk qetilkirina Gerînendeyê Rojnameya Agosê Hrant Dînk meşek li dar xist û bi sloganên, "Em hemû Hrant Dînk in", "Em hemû Ermenî û Kurd in" berteka xwe anîn ziman.

Bi hezaran kes li qada Taksîmê ya Stanbolê kom bûn êrîşa hovane bi dirûşmên "Dewleta Kujer" şermezar kirin

Bûyer di medyaya tirk û Ewrûpayê de jî di rêza yekemîn de ye

Bûyer di medyaya tirk û Ewrûpayê de jî di rêza yekemîn de ye û hemu rayedarên YE û rayedarên DYE kuştina Dînk şermezar kirin.

Diasporaya Ermenî û hikumeta Ermenîstan ji ber qetlîma Hirant Dînk dewleta Tirk şermezar kirin.Tê payîn û piştî vê bûyerê diaporaya Ermenîstan hin bêtir bo pejirandina komkujîya Ermenîyan hewl bidin.
 

Pêvajoya ji darizandina ber bi kuştina Hrant Dink

Li dijî Hrant Dînk îddaya “heqeret kirina Tirkbûnê” doz hatibû vekirin.Doz li ser gotareke Dink ya li rojnameya Agos(www.agos.com.tr) de hatibû weşandin hatibû vekirin.

Li dijî Hrant Dînk wek di Orhan Pamuk de li Tirkîyeyê marûzî kampanyayekê êrîşên faşîstên Tirk ma bû.Li medyayê heta kolanan ku faşîstên Tirk ji xeynî Tirkan hemû pêkhatên Tirkîye înkar dikin û êrîş dikin û tehemmulî vegotina rastîyan nakin.

Hrant Dînk berovajî Ermenîyên din hin nermtir û erênîtir beramberî kiryar û polîtîkayên dewleta Tirk tevdigerîya.

Piştî dozê û kampanyaya êrîşkarî û lînç krinê tehdîtên cur bi cur ji Dink re hatibû şandin.Helwesta medyaya Tirk û dewleta Tirk bû bû sedem ku êrîşkarîya şovenên Tirk beramberî Hrant Dînk û Orhan Pamuk hate bilind kirin û fît kirin.Hrant Dînk bi êrîşa dawî jî hate kuştin.

Li Tirkîye wekî her carê li dijî ramanê helwestekê şovenî hat nîşan dide.Dewleta Tirk û faşîstên Tirk tu carî tehemmullî avakirina demokrasîyê û azadîya ramanê nakin.

Hrant Dînk ku hertim ji aliyê hêzên ser bi dewletê ve hedef dihat nîşandan, sala 1954an li Meletiyê ji dayik bûye.

Ji sala 1996'an bi vir ve, nivîskarê sereke û gerînendeyê giştî yê rojnameya Agos'ê bû.

Hedefa Qetla Hrant Dînk

Li gor texmînan çend îxtîmala qetl kirina Hrant Dînk heye.Îxtîmala yekemîn deshilatîya veşartîya dewleta Tirk,hêzên şoven yê tirk,arteşa Tirk,dijminên Kurdan û gelên din,kemalîstên faşîst, çeteyên tarî,derdorên mîlîtarîst û hemû hêzên ku ji berjewendîyên xwe ji demokratîze bûna ji dest didin bo ji nû ve serdest kirina faşîzm û paşve girtina hin destkeftîyên Kurdan û anîna desthilatîyeke faşîst û milîtarîst û rûxandina desthilatîya hikumeta AKP ye.

Îxtîmaleke din jî ji alîyê kes an jî çend kesên nezan û şoven ve li ser fît kirin û navtêdanê ya medya û derdorên şoven wek bûyereke munferÎt hatibe çêkirin.

Dewleta Tirk û qirikirina Ermenîyan
 

Di 24`ê Nîsana 1915`an de rêveberiya Osmanî, jin, mêr, zarok, ciwan û kal negot, bi sed hezaran ermenî û asûrî qetilkirin.

Bajar, navçe, bajerok, gund û mezrayên ermenî lê dijîyan, vegerandin gola xwînê. Ev komkujî, wekî komkujîya yekemîn a sed-sala 20`mîn di rûpelên dîrokê de cih digirt.

Li ser komkujiya bi mirina bi sedhezaran kesan re, 90 sal derbas bû, lê, hê jî rêveberiya Tirkiyê, komkujiyê înkar dike.

Terorîzma bênavber ya faşîstên Tirk û dewleta Tirk

Di maweya 80 salê de gelê Kurd û dijberên rejîma faşîst ya Tirkan beramberî gelek hewlên zordarî û çewsandinê re rûbirû man. Di destpêka salên 80an de li Kurdistana bakur û Tirkîyê cunteya leşkerî hat ser hukm. Bi hezaran Kurd û çepgir hatin girtin û kuştin. Zilm û zordarîyên nedîtî li ser gel pêk anîn. Li Tirkiyê her çiqas partiyên curbecur dibin hikumet jî desthilatdarî hertim di destê generalan de ye.

Di dîroka Tirkîyeyê de bi sedan bûyerên wek kuştina Hitant Dînk û êrîşên cur bi cur çê bûye û her carê Dewleta Tirk ser van bûyeran girtîye.Komara Tirk her carê de bûyeran wekî bûyerekê minferît nîşan dide.Lê êdî zêdetir têkîlîyên berjewendîxwaz û şoven navbera arteşa Tirk,polîsên Tirk,sermayedar,medya,dewleta kûr û sîyasetê tê zanîn.

Bi dest xistina hin mafên biçûk li Tirkîye bi giştî li bakûrê Kurdistanê bi taybetî hêzên nijadperest , arteşa Tirk,dijminên Kurdan,kemalîstên faşîtst, çeteyên tarî,derdorên mîlîtarîst û hemû hêzên ku ji berjewendîyên xwe winda dikin dixe nava tirsê û êrîşên bi vî rengî derdikevin holê.

Li Tirkîye nivîskar û rojnamevanên wek Tirk û Kurd wek Abdi İpekçi (1979), Umit Kaftancıoğlu (1980), Sami Başaran (1989), Çetin Emeç (1990), Musa Anter(Apê Musa) (1992), Uğur Mumcu (1993), Metin Goktepe (1996), Kutlu Adali (1996), Ahmet Taner Kişlali (1999) Û bi sedan rojnamevan,nivîskar û kesên sivîl û bêtawan ji alîyê hêzên nijadperest ,arteşa Tirk,dijminên Kurdan,kemalîstên faşîtst, çeteyên tarî,derdorên mîlîtarîst ve hatin kuştin.

Her wiha wek di bûyerên Susurluk û Şemzînanê jî tu carî tawanbarên bûyeran bi vî rengî nehatin darizandin û tu bûyer jî nehatin ronî kirin.Li Tirkîye  fikr û hizrên rast an jî ne rast nayê tehemmul kirin û li şûna dîyalogê û têgihêştinê ser mirovan kuştin tê ferz kirin. (HAWAR DENGÛBAS / Ajansan)

Hemû mafên nûçe û nivîsên ku destnîşana HAWARDENGÛBAS hatiyê danîn ser navê Hawar Kurdistan Media Group ya HAWARDENGÛBAS e.Beyî destûr naye bikaranîn.

Binivsîne  |  Biçe Jor   

Hemû Naveroka Cîhan

irêdan