Li Kurdistana Azad Desthilatîya Şîrketên Bîyanî,Bi taybetî yên Tirkan, 25 Pûşper,2006

HAWARDENGÛBAS,HEWLÊR,Kurdistan-- Divê hikumeta Kurdistanê hemû hêsanî bo bazara vekirî cêbece bike lê divê hin bi riya qanunê şîrketan re hin xalên taybetî wek mîmarîya Kurdistan, parastina zimanê Kurdî,rêz lê girtina nirxên Kurdeyatî û bi zelalî kar kirin bê dîyar kirin.

Hêlîn PASEWAN / HAWARDENGÛBAS

Li Kurdistana azad bi zagonek nû di serî de, di sektora neftê de hemû deri bo karsazan re heta dawiyê tê vekirin.

Di meha gulanê de du îdareyên heyîn piştî 15 salan bûn yek û vê yekê li ser pêşveçûnên nû bandorek erênî kir. Projeya zagona nû ya hatî amadekirin ji 26 xalan pêk tê û bi van xalan hemû deriyên aboriyê ji karsazên biyanî ve tê vekirin.

Proje bi têgiheştinek lîberal û teşfîqkar hatiye amadekirin. Zagon karsazan nêzîk 10 salan ji bacê muaf digire, kirîna axê û birina hatiniyên xwe ji bo welatê xwe jî serbest dike. Her wiha karsaz dikare mal û karkeran jî ji derve bîne.

Birêvebirê Giştî yê Wezareta Bazirganiyê a Kurdistana Federe Azîz Îbrahîm ragihand ku li Kurdistanê niha 500 ji wan tirk 4000 hezar şîrket xebatê dikin. Piştî ku qanûna veberhênanê li parlamentoyê bê qebûlkirin pêşbînîya (texmîna) wan ew e ku ev hejmar ê bibe du qat. Wî got gelek şirketên biyanî ji bo hatina Kurdistanê li benda vê qanûnê ne.

Kanûnek nû tê amade kirin

Serok wezîrê Kurdistanê Nêçîvan Barzanî jî di derbarê kanûna nû ya bo karkirina bîyanîyan de got ku zagona têkildarî vê mijarê tê amadekirin, dê di hefteya bê de bê Parlementoyê û bi vê yekê dê deriyên xwe ji razmendên biyanî re vekin. Barzanî got ku Kurdistan bi aramî û sikûneta xwe ji bo bazirganiyê xwedî derfetên girîng e û bi vê zagonê hemû mafên karsazan tên misogerkirin.

Serokê Kurdistanê û birêvebirên Kurdistana azad gelek caran eşkere kirin ku wê Kurdistana azad bo sermaya bîyanî bibe qadekî azad û û Kurdistan bibe wek Qatarê.

Azadîya bê sînor xeteran diafrîne

Eşkereye ku hikumeta Kurdistanê bo avadanî û pêşketina Kurdistana azad polîtîkayek wisa dimeşînin.Lê ger tedbîrên hewce wek welatên Ewrûpayî neye girtin wê ev desthilatîya şîrketên bîyanî jî zirarê bide nirxên neteweyî.

Divê taybetmendîya Kurdistanîyetî were parastin.Her şîrketekî ku tên Kurdistana azad bi taybetî yên avahîsazîyê rê li pêk hatina mîmarîya Kurdî dibe.

Divê hikumeta Kurdistanê dîsa hemû hêsanî bo bazara vekirî cêbece bike lê divê hin bi riya qanunê şîrketan re hin xalên taybetî wek mîmarîya Kurdistan,parastina zimanê Kurdî,rêz lê girtina nirxên Kurdeyatî û bi zelalî kar kirin bê dîyar kirin.

Tê zanîn ku wexta qebûl kirina wan şîrketan de qendelî û hin planên veşartîya Tirkan jî tê rojevê.

Divê nirxên Kurdistanê werin parastin

Li Kurdistana Azad gelek sektor û qad roj bi roj mezin û berfirehtir dibin.Lê Hikumeta Kurdistanê beyî ku hin hessasîyetên neteweyî berçavan bigre destûrê bo şîrketên bîyanî tê dayîn.

Pêşketina milletekê di her waran de hewcedarîya yekemîn û girîng aborîye. Divê pêşarojê de dewlet destê xwe ji sekora xizmetê vekişîne.Lê bi yasayan hîmên neteweyî ser bingeha babetên nûjen werin parastin.

Divê Kurdên ji perçeyên din jî tevlî pêşketina hanbibin û sermayeyek neteweyî û yek girtî çêbibe da ku ev hatinî bo pêşketina Kurd û Kurdistan were bikaranîn.Divê ihracat zêde be û sistema bazara vekirî ser hîmen netewî were avakirin.

Mijara neftê mijarake taybet e

Niha petrol bi destê şîrketên bîyanî tê derxistin.Sektora taybet raste ku divê were pêşxistin.Mijara neft û enerjîyê mijareke cûda û girîng û ji ber vê yekê jî divê kontrola ser petrol û çavkanîyên sirûştî di destê hikumeta Kurdistanê de be.

Divê pêşî sîstema karkirina navxwe were rêkûpêk kirin

Gelek caran gilî û gazîndeyên gel ji dezgehên hukmî te rojevê.Meseleyên ruşvet û hwd. Pirsgirêkin cidî ne.Her wiha daîreyên fermî kêm kar dikin.

Dereng vedibin û zû tên girtin.Heman kêmasî di tevahîya jiyana kar û xebatan de heye.Li Kurdistana azad tatîl gelek zêde ne.Saetên karkirinê kêm e.

Divê bo pêşketina Kurdistana azad stratejîyên çewt neye şopanadin.Ji ber ku bingeh çawa were avêtin wê pêşketin jî bi vê avahî pêk were.