Beşa Kurdistan

Daxûyanîya hevbeş ya PDK-Bakûr,PWD,PSK; Ji awira gelemperî re
 

31 Tebax, 2006 weşandin:06:32:22 (GDK)

Kurdistana ku hebûna çand û welatê Kurdan îfade dike, êdî ji rastî û ruyê cîhana guhertî wêdetir, di heman demê de bûye hêzek girîng ji hêzên taybet ên cîhanê.Tasfîyebûna rejîma Saddam, jibo qevaztina rejîmên nîjadperest, fanatîk, aloz û rejîmên ku hebûna gelê Kurd bi tiştekî nedihesibandin gava yekem bû; jibo temamkirina vê û rakirina serdestiya nîjadperest a li ser gelê Kurd, pêwiste Kurd hêzên xwe nûjen bikin û bikin yek. Di tasfîyekirina rejîma Saddam de Kurdan rola hêzek ji hêzên sereke lîztin. Biryarmendîya hêzên başûrê Kurdistanê, erkek ji erkên dîrokî a li himber gelê wan bû.

Encam ev e ku, divê di nava Dewletên Federe ên Iraqê de herêma Kurdistanê bibe wek giravek azadiyê. Hebûna Kurdistana azad divê îro jibo hemi Kurdan bibe kanîya şanaziyê, û hem jî wê wek çavên xwe biparêzin. Lê ev bi tenê bergeha yekemîn e. Çi di bicîhbûn û paraztina hebûna Kurdistana azad a dîrokî de, çi di temamkirina pêvajoya herêmî a piştî tasfîyekirina rejîma Saddam de û di vê pêvajoyê de pêkanîna erkên ku Kurd pê rabûne, inceq bi yekîtîya û hevkarîya wan a li seranserê Kurdistanê ve girêdayî ye.

Pêvajoya mudaxeleya Rojhilata Navîn a ku bi mudaxaleya Îsraîlê a li ser Lubnanê giha bergehek nûjen, dide xuyakirin ku wê Kurd di vê pêvajoyê de bi her awayî rolekê bilîzin. Kurdên ku di her beşên welatê xwe ên parçekirî de xwediyê potansiyelek girîng in, êdî di hesabên hêzên dinyayê ên ku dixwazin rû û nûjeniyek sîyasî bidin herêmê de, hêzek berbiçav in.Kurdistana azad, di dengeya hêzan de ciyê xwe ê rastî girtiye; Kurdên Rojhilat û Rojavayêbaşûrê Kurdistanê jî, ger karibin helwest û yekdengiyekê pêkbînin amadene rolek erênî bilîzin.

Lê ne mimkine ku em karibin îro heman tiştî jibo bakurê Kurdistanê bêjin. Hinek hêz jî çi mixabine ku, bi polîtîkayên xelet û xeter armanc û hedefa dewletbûn û rayedarîya gelê Kurd a li ser axa xwe serûbinê hev û daxwazên me ên netewî aloz dikin. Dîsa ev hêz di hava helwest û çalakiyên têkbirina rewşa erênî a Dewleta Federel a Kurdistanê de ye. Tevgera welatparêz a bakurê Kurdistanê bêşik divê têkiliyên navxweyî ên netewî bi xurtî baştir bike, polîtîkayek hevbeş a netewî pêkbîne û li himberî erkên ku rû bi rû mane gavên çareseriyê bavêje.

Pêvajoya ku DYB (Dewletên Yekbûyî ên Amerîka) û hevpeymanên xwe bi mudaxeleya Iraqê re destpêkirin, di eslê xwe de ji şerekî sergirtî derketiye û bûye şerekî herêmî. Di pêvajoya mudaxeleya hetanî îro de, axa Iraqê Tirkiye jî di nav de jibo hemi rejîmên herêmê bûye wek hola şer. Rejîmên statukoparêz, rola xwe a dijberîya guhertinê bi taybetî li vir lîztin û dilîzin. Di serî de hêlên şoven ên dewleta Tirk, bermayîyên hemi rejîmên ku ji azadîya Kurdan ditirsin, bi armanca rêlibergirtina azadîya Kurdan bi hemi hêza xwe çalakiyên xwe ajotin û hîna jî dajon. Lê li bakurê Kurdistanê, li himber hemi çalakîyên dijberên ku dixwazin wan ji dîrokê rêşkin, hewldanên jibo netkirina polîtîkayek netewî berdewam in.

Li bakurê Kurdistanê jibo me berî hertiştî yekkirina hêzên netewî û netkirina polîtîkaya li himber tevgera mezin a li herêmê ye. Di pêvajoya derbasbûyî de, di vê derbarê de hinek pêdaketin û însîyatîf hatin lidarxistin. Belavokên hevbeş ên PSK û PDK-Bakur, PSK û PWD, PDK-Bakur û PWD û îfadekirina daxwaza yekîtîyê gavên girîng bûn. Lê bipêşdetirxistina vê însîyatîfa yekîtîyê, xurttirkirina wê û di praktîkê de jîyandina wê pêwist e.

Bi mebesta bersivdana van hewcedarîyên ku li bakurê Kurdistanê derketine holê PDK-BAKUR, PSK, PWD;

1- Li bakurê Kurdistanê jibo pêkanîna yekîtîya netewîya Kurd, di çarçova “mafê çarenûsîya azad a netewî” de jibo ku bi riyên demokratîk û siyasî doza netewa Kurd bê bidestxistin, di her bergeh û di her warî de xebat û tekoşînek hevbeş bê kirin;

2- Li gora vê armancê, li bakurê Kurdistanê bi hemi welatparêz , derûdor, grûp, partî û rêxistinên sivîl ên civakî re têkilî bên danîn û xebat bê kirin da ku di hevparîya netewî de wan bînin cem hev;

3- Di serî de bakurê Kurdistanê, li Ewrûpa û deverên din ên derveyî welêt li ser navê yekîtîyê komîte, nûnerî û buro bên sazkirin;

4- Di serî de mewzîya azadîyê a ku li başûrê Kurdistanê derketiye holê li ser navê Kurdan hatiye qezenckirin û di bin her şert û mercî de divê wek hêjayîyek hevbeş pê paraztin û xedîlêderketin, û di gellek mijarên din de em gihane dîtin û biryarên hevbeş û me rewa dîtiye ku em van encaman ji awira gelemperîyê re bidin zanîn.


Komisyona Hevbeş a Xebatê a PDK-BAKUR, PSK, PWD .

Hemû mafên nûçe û nivîsên ku destnîşana HAWARDENGÛBAS hatiyê danîn ser navê Hawar Kurdistan Media Group ya HAWARDENGÛBAS e.Beyî destûr naye bikaranîn.