Kurdistan

Dewleta Tirk Nehişt Ku Diyarbekîrîyan Piştgirîya Kerkûkê Bikin

NÛÇE-ŞÎROVE;HESEN DILGEŞ / HAWAR DENGÛBAS

05 Adar,2007 weşandin:09:32:50 (GDK)

HAWAR DENGÛBAS,AMED,Kurdistan --Dewleta Tirk dîsaji hewldaneke Kurdan eciz bû. Konferansa Kerkûkê ku li Amedê dê bihata lidar xistin, ji hêla walîtiya Amedê ve hate qedexekirin.

Grûba Xebata ya Demokratîk û Neteweyî ya Kurd ji bo deşifrekirina siyaseta Tirkiyeyê li hemberi Kurd û Kurdistanê, li Amedê Konferansa Kerkûkê dê doh bihata ba li dar xistin. Konferans wê li Amedê li 'Demîrok Tesîslerî' ya li taxa Îstasyonê de pêk hata ba.

Dewleta Tirk dîsa ji vê hewldanê Kurdan tirsîya û eciz bû.Konferansa Kerkûkê ku li Amedê dê bihata lidar xistin, ji hêla walîtiya Amedê ve hate qedexekirin.

Birêvebiriya Konferansê, ku ji Grûba Xebatê ya Demokratîk a Neteweyî ya Kurd ve ku ji aliyê Komîteya Amadekar Arîf Sevînç, Îbrahîm Guçlu, Sabahatîn Korkmaz, Bayram Bozyel, Osman Karavîl û Sitki Zîlan pêk tên li ber salona ku wê konferans lê bihata lidarxistin, civinek çapemeniyê lidar xist û vê biryara hovane, bi tundî şermezar kir.

Daxuyaniya şermezarkirinê, bi beşdarbûna birêvebirên Partî, Komel û Saziyên Kurd yen wek Serokê Giştî yê Hak-Parê Sertaç Bûcak, Serokê Baroya Amedê Sezgîn Tanrikûlû, Serokê Kurd-Kavê M. Celal Baykara, Însiyatîfa Partiya Kurdistanî, Komeleya ÇIRA, Komeleya Ehmedê Xanî, Komeleya Ciwanên Kurd, Komeleya Mazlûman, Komeleya Azad, Komeleya Civakî, Komeleya Forma Demokratîk ya Kurd û hêjmarek mezin siyasetmedar, rewşenbîr li ber avahiyên Demîrokê bi civîneke çapemeniyê hat
belavkirin.

Mazlumder, Toplum-Der, Baroya Amedê û Ozgur-Der’ helwesta dewleta Tirk şermezar kirin

Mazlumder, Toplum-Der, Baroya Amedê û Ozgur-Der’ê li dijî qedexekirinê nerazîbûn nîşan dan. Li ser navê komê Parêzer Sabahattîn Korkmaz daxuyanî da û diyar kir ku konferans li dijî qanûnê, bi awayekî kêfî hatiye qedexekirin. Her wiha Prz.Korkmaz girtina Serokê DTP’a Amedê Hîlmî Aydogdu jî şermezar kir.

Dewleta Tirk û dijberên Kurdan ji ber helwesta yekgirtî ya Kurdan eciz dibin

Dewleta Tirk û faşîstên Tirk tu carî tehemmullî pêkhatina yekîtîya Kurdan nakin û qeyîl nabin ku Kurd bigêhêjîn mafên xwe yên rewa.

Bi dest xistina hin mafên biçûk li Tirkîye bi giştî li bakûrê Kurdistanê bi taybetî hêzên nijadperest , arteşa Tirk,dijminên Kurdan,kemalîstên faşîtst, çeteyên tarî,derdorên mîlîtarîst û hemû hêzên ku ji berjewendîyên xwe winda dikin dixe nava tirsê û êrîşên bi vî rengî derdikevin holê.

Dijberên Kurdan ditirsin ku gelê Kurd nêzî hev bibe û naxwazin ku gelê bakûrê Kurdistanê jî piştgirîya Kurdistana Azad û meseleya Kerkûkê bikin û Kurdistana azad jî piştgirîya bakûrê Kurdistanê bike bi vê avahî hêza Kurdan zêdetir be û polîtîkayên dewleta Tirk bi her avahî têk biçe û hemû angaştên dijberên Kurdan bi tetmamî pûç bê derxistin.

Ji ber wan sedeman jî ji alîyekî heqeratan li dijı serokên Kurdan dikin,tehdîdan li dijî Kurdistana azad dikin û li alîyekî din jî tirsa têk çûna polîtîkayên 85 salî yê ku ser bingeha "Kurd û Kurdistan nîne"an jî Kurd nikarin tiştek bikin" hatiye damzirandin û niha jî bi eşkere bûna nerast bûna wan polîtÎkan di dilê dijberên kurdan de peyda bûye.

Ev yek jî nîşan dide ku bi yek dengî û yekrezî hereket kirina kurdan hêza giştî ya kurdan zêdetir dike û li başûr pêvajoya pêşketin û serxwebûnê li bakûr jî ji nû ve bi lêz bûna têkoşîna rizgarêyê,bi dest xistina mafên rewa yên neteweya Kurd û têkdana polîtîkayên dagirkerên Kurdistanê hêsantir dibe.(HAWAR DENGÛBAS)
 

Daxûyanî;Daxûyanîya Grûba Xebata ya Demokratîk û Neteweyî ya Kurd

"Geli Mêvanan, Xwişk û Birayan,

Geli Rojnamevanên Hêja,

Hûn hemî bi xêr hatıne prens konferansa me.

Wek ku tê zanin dıviyabû me iro li vêderê “Konferansa Kerkûkê” pékbihanîya. Belê Parézgarîya Dîyarbekir, konferansa me qedexekir. Bêşik ev biryareke antîdemokratîk, nehiqûqî û keyfî ye. Belê ya herî balkêş jî ew bû ku, hêzên ewleyî berî biryara Parêzgar, çend caran bi ser xwedanê salonê de girtine û ji bo ko ew salona xwe bi me nede hatîye tehdîtkirin. Em bala hemû sazîyên sivîl, maf parêz û raya giştî a demokratîk dikşîn in ser evê keyfiyetê û bi tundî şermezar dikin.

Wek ko em hemû ji nêz ve dibîn in û bi îbret di şopîn in; ev demeke ko di serî de fermandarên leşkerîya Tirk, rayedarên hukûmetê û qismek ji nûnerên sîyaset û medyayê bi behana “Pirsa Kerkûkê” û ‘xwedê negiravî’ parastina ‘heqê turkmanan’ li dıjî statuya Kurdîstana Iraqê a Federeyî kampanyayekî bêperwa dane destpêkirin. Li ber çavê dunyayê bahsa dagirkirina “Bakûrê Iraqê”, yanî Kurdîstana Başûr dikin. Li Kurdan heqaret, gef û tehdîtan dibarîn in. Li hamberê vê yekê kes nikare tiştekî bêje; gilî, gazinc û rexneyekî bike. Derhal têne girtin, cezakirin û tehdîtkirin. Bêterefî û objektîfîya dadgehan nemaye. Hîqûq berevajî pêktê û bûye payanda hêzên şovenîst. Hemû cure heqaret, çêr, gef û çewsandina Kurda serbest e. Belê kesek nikare bêje hun çima êrîşî Kurdan dikin, li Kurdan, rêvebirên wan heqaret û heqsizîyê dikin. Derhal têne girtin û cezakirin. Mînaka dawî girtina Brêz Hîlmî AYDOGDU ye. Bi vê wesîlê em girtina Hilmi AYDOGDU ne hıqûqi dıbinin û şermezar dikin.

Em dı wê nêrinê de ne ku,êriş ali hamberi Kerkukê di êslê xwe de li hamberi Baskûrê Kurdistane ye. Jı ber ko heger pırsa Kurd lı Tırkiyê tunebaya mumkûn bû ko jı herkesi zêdetır Tırkiyê pıştgıriya Kurdıstana Federe bıkıra.

Mesela “Heqê Turkumanan” behanekî pûç û vala ye. Dunya hemî pê dizane ko di navbera Kurd û Turkumanan de tu nexweşî çênebû ye û tune ye. Wexta ko hukumeta Sedam Kurd û Turkuman bi hev re qetil dikirin, Tirkîye dost û mutefîkê Sedam bû. İro li herêma Kurdîstanê Turkuman xwedî hemû mafên xwe yên însanî, kulturî û kêmneteweyî ne. ...

Di dewra Romayê de ji koleyan re digotin “haletên bi ziman.” Rast e, însanekî nexwedan maf, wek pergalekî ye. Ne şeref û îiyaneta xwe û ne ji qedr-qimeta xwe heye. Ji wê bonê, însan bi mafên xwe însan e û meqbûl e. Di hemû olan de însan wekhev e, çavkanîya mafa ye û muqedes e. Herweha di navbera qewm û miletan de jî tu cudatî newekhevî nîn e. Hemû milet wek hev xwedan heq ın û dıvê bırabın.

Miletê Kurd, yek ji wan niştecîyê Mezopotamyayê yê herî kevn e. Xwedan tarîx, kultur, edebiyat û zimanekî dewlemend e. Miletekî nîştecî, kedkar û azadîparêz e. Ji xeynî biratî, dostani û alîkarîyÊ tu xerabi bi miletên cînar; Ereb, Faris û Tirk re nekir ye. Balam îro li seranserê dunyayê û rohilata naverast yek ji wan miletên herî mazlûm û bindest e. Ji hemû mafên xwe yên neteweyi/kolektifi û pêve grêdayî îinsanî/kesayetî bêpar e. Di bin zılm û neheqîyekî gran de ye. Di heman demê de bi komkujî, koçberî û qirkirinan re rû bi rû ye.

Bi vê wesilê em bang li her kesî dikin û dibêjin ku; wek her miletekî medenî û hemdem qedera xwe bî xwe tayîn kirin mafê miletê Kurd ê rewa ye. İro birayên me Kurdên Başûrî di çerçewa Iraqa Federal de gihîştine azadîya xwe. Mesela Kerkûkê, -tevî ko ne bi dilê Kurda bû jî-, li gor Destûra Iraqa Federal xala 140-î dê bi referandûmê çareser bibe. Pirsa referandûma Kerkûkê, pirsa Iraqîyan a navxwe ye. Bi tu hawayî mafên mudaxeleya dewletên cînar tune ye. Di vê derbarê de divê bê zanîn ku; Kurdên Iraqê birayên me ne. Zimanê me, kultura me, hestên me û qedera me yek e. derdê wan derdê me, azadîya wan azadîya me ye. Em dest-dev dirêjiya li hamberê wan li hamberê xwe dizan in û bi tu awayî qebûl nakin. "

Dîyarbekir 04.03.2007

GRÛBA XEBATA KURD A NETEWEYÎ Û DEMOKRATÎK

Hemû mafên nûçe û nivîsên ku destnîşana HAWARDENGÛBAS hatiyê danîn ser navê Hawar Kurdistan Media Group ya HAWARDENGÛBAS e.Beyî destûr naye bikaranîn.

Binivsîne  |  Biçe Jor   

Hemû Naveroka Beşa Kurdistan

irêdan