Kurdistan

Tirkmenên Kerkûkê:"Bila Dewleta Tirk Bo Planên Xwe Navê Tirkmenan Bikarneyîne"

28 Rêbendan,2007 weşandin:07:29:32 (GDK)

HEWLÊR,Kurdistan -- Serokê Gruba Tirkmenan a Parlamentoya Kurdistana azadl Kerxî Altiparmak, li hemberî civînên li Tirkiyeyê ku li ser Kerkûk û tirkmenan tên lidarxistin û daxuyaniyên rayedarên Tirkiyeyê nerazîbûn nîşan da. Altiparmak, destnîşan kir ku li Herêma Kurdistana Federal pirsgirêka tirkmenan nîn e.

Altiparmak, destnîşan kir ku nîqaşên li Tirkiyeyê yên li ser tirkmenan tên kirin, ji bo berjewendiyên tirkmenan nîn e û wiha dom kir: "Me wekî tirkmenên li Herêma Kurdistana Federal, hemû mafên xwe girtine. Em naxwazin ev maf ji destê me biçin. Em wekî gelê tirkmen ji bo zêdetir maf bi dest bixin, hewl didin. Li gorî nêrîna me ev mafên hanê jî dê xebatek hîn zêdetir a bi birayên kurd re, bêne bidestxistin. Ji ber vê yekê jî li gorî me nêrîn û nirxandinên Tirkiyeyê yên li ser tirkmenan, ne ji bo berjewendiyên tirkmenan e. Di nîqaşên li Tirkiyeyê tên kirin de, tê gotin ku mafên tirkmenan nayê dayîn, zordestî li wan tê kirin. Ev gotin ne rast in. Ji bo rayedarên Tirkiyeyê hinek rapor li Iraqê tên amadekirin. Ew jî li gorî van raporan civînan li dar dixin û nirxandinan dikin. Bi rastî jî heke li ser gelê tirkmen zordestî bê kirin, em qebûl nakin. Tirkmen wekî hemû gelan azad in. Divê pirsgirêkên li Iraq û Herêma Kurdistanê tên jiyandin, ji aliyê gelên vir ve bêne çareserkirin."


PIŞTGIRÎ DA XALA 140’AN

Nûnerê tirkmenan Kerxî Altiparmak, anî ziman ku xala 140'an a Qanûna Bingehîn a Iraqê ku li ser Kerkûkê ye, li gorî berjewendiyên tirkmenan e û wiha got: "Em ê nifûsa xwe ya li Herêma Kurdistana Federal zêde bikin û wekî neteweyek duyemîn bijîn. Ev ji bo me baştir e. Kerkûk bajarekî Iraqê ye. Li Iraqê Qanûnek Bingehîn heye. Di Qanûna Bingehîn a Iraqê de xala 140'an heye. Ev xal jî ji 3 xalên esasî pêk tê. Yek vegera kesên di dema rejîma Sedam de hatine koçberkirin, didu navçeyên bi armanca guhertina nifûsa Kerkûkê ji bajêr hatine veqetandin. Dê ev navçe li ser bajêr ve bêne girêdan. Ya sisêyan jî ew e ku di encama vê yekê de referandûm bê çêkirin û li gorî wê Kerkûk li ser herêmekê ve bê girêdan. Xala 140'an tenê ji bo Kerkûkê nîn e. Ji bo çêbûna Iraqa Federal xala esasî ye."


‘EM Ê BIRYARÊ BIDIN’

Altiparmak, bi bîr xist ku mafê Tirkiyeyê tune ye ku bikeva nava pirsgirêka Kerkûkê û wiha berdewam kir: "Qedera Kerkûkê, dê ji aliyê kurd, tirkmen, asûrî, keldanî û erebên li bajêr dijîn ve bê diyarkirin. Ne em, ne Tirkiye, ne jî hêzek din nikare li ser Kerkûkê biryarê bide. Heke tiştek em dixwazin hebe, ew jî ew e ku em wekî tirkmen, kurd, asûrî û keldanî, li Herêma Kurdistanê bi awayekî rehet bijîn."

Kerxî Altiparmak, da zanîn ku tirkmen li başûrê Kurdistanê bi aramtir in û ger ku Tirkiye bi vê polîkayê nêzî tirmenan bike, dê tirmen tu tiştî bi dest nexin. Altiparmak, wiha dawî li axaftina xwe anî: “Divê tu welatekî ji derve, xwe têkilî kar û barên Iraqê neke. Çimkî ev pirsgirêk, pirsgirêkek navxweyî ye. Gelên ku li Iraqê dijîn, dikarin der barê pêşeroja vî welatî de biryara xwe bidin. Bila tu kes mudahaleya pirsgirêkên navxweyî neke. Tirkmen û gelên din ên li vir, dê di nava biratî û yekîtiyê de bi hev re bijîn. Em dixwazin aştî bi ser bikeve.”(Dîha)

Hemû mafên nûçe û nivîsên ku destnîşana HAWARDENGÛBAS hatiyê danîn ser navê Hawar Kurdistan Media Group ya HAWARDENGÛBAS e.Beyî destûr naye bikaranîn.

Binivsîne  |  Biçe Jor   

Hemû Naveroka Beşa Kurdistan

irêdan