Daxuyaniya Meclîsa Federasyona Komeleyên Êzdiyan, 17 Tebax,2007 | Kurdistan

DAXÛYANÎ-- Dîsa ji başûrê welêt agahiyên nexêrê tên. Dîsa li ser êzdiyan ferman e. Li herêma Şengalê li komelgeha Sîba Şêx Xidir û Gir Ozer li ser kurdên êzdî komkujiyek hovane pêk hat. Li gor agahiyên dawî zêdeyî 500 kesên êzdî, ku piraniya wan zarok û jin in, bêsûc û sebeb ji aliyên teroristan ve bi awakî hovana ve hatin qetilkirin.

Kê ev hovîtî kiribe, tu eleqeya wî ne bi xwedê re, ne bi dîn re ne jî bi mirovahiyê re heye. Bûyer temamî terorîstî yê û qetlîm û wehşeteke hovane li dij êzdiyan e, li dij kurdan e, li dij Kurdistanê yê û li dij mirovahiyê ye. Bi vê bûyerê derdikeve holê, ku teror tu dîna nas nake. Wisa xuya dike ku ev êrîşa hovane plankirî û bi hin armanca hatiye kirin.

Wek tê zanîn ji dema hilweşîna Rejîma Beasê ve, li Iraqê roj naçe ku bi dehan mirov di encama êrîşan de neyên kuştin. Iraq bûye zeviya mirinê. Devera hebkî bêdengî, aramî û ewlehî lê heyî Herêma Kurdistana Federe ye. Lewma kesên ji Iraqê direvin, wek cihekî ewle, berê xwe didin herêma kurdan. Em dinerin hêzên li dij kurdan vê aramî û ewlehiyê tahmûl nakin û dixwazin wir jî tevlî hev bikin. Bi taybetî bo referandûma Kerkûk, Xaneqîn û Şengalê asteng bikin hemû rêbazên terorîstî bikar tînin. Ev hêzên dijminê kurdan û kurdistaniyan dixwazin başûrê Kurdistanê bikin nav qaosê û bi taybet dixwazin di nav niştecihên herêmê de nakokiyên heyî zindî bikin, şerê ol û dînan derxînin û mirovên herêmê berdin hev. Wisa xuya dike, armanca vê komkujiya dawî ev e, ku herêmê ji kurdên êzdî vala bikin û bi vî awayî di referandûmê de aliyê ereb bi serkeve. Navê vê kiryarê di lîteratura cîhanî de paqijiya etnîkî ye û ev yek sûcê mirovahiyê ye.

Dîsa li gor dîtina me li pişt vê komkujiyê hêzên cîranê Kurdistanê ku naxwazin kurd bi ser kevin, hene. Hin lepên reş û bêyom di Başûr de dest bi tevlîheviyan û qetlîaman kirine.

Em wek Meclîsa Federasyona Komeleyên Êzdiyan bang û daxwaz dikin ku,

1- civaka kurdên êzdî li başûrê Kurdistanê, li hember êrîşen bi vî rengî bi metanet tevbigere, neyê provakasyona, yekîtiya xwe, tifaqa xwe çêbike û xwe birêxistin bike. Bo ewlekariyek mayînde bi rêvebiriya herêmê re xebatek hevbeş bimeşine û devera hewce zextê li hukûmeta Kurdistanê bike.

2- hukûmet û rêvebiriya herêmê jî, bi hemû hêz û derfetên xwe biçe ser bûyerên bi vî rengî. Erkên desthilatdariya xwe bi cih bîne, zagon û yasayan bide meşandin, ewlekariya welatiyan û bi taybet a êzdiyan, ku ew wan wek kurdên resen bi nav dikin, pêk bîne.

3- ji her çar perçeyên welêt, hemû kurdên niştimanperwer divê bertekek ji a kurdên êzdî hişktir li hember vê bûyerê nîşan bidin, piştgiriya xwe û biratiya xwe bo êzdiyan di pratîkê de bidin xuyakirin.

4- hêzên navnetewî yên wek UNO, AI, DYE û YE peywirên yên navnetewî bi cih bînin û ji bo kurdên êzdî jî rista xwe bilîzin û berpirsyariya xwe bînin cih.

Tevlî van bang û daxwazan dîsa wek Meclîsa Federasyona Komeleyên Êzdiyan vê komkujî û hovîtiya li dij me hatî kirin bi tundî protesto û şermezar dikin, sersaxiyê ji gelê xwe re dixwazin û dibêjin bi her awayî em bi we re ne û em li cem we ne. Em wek FKÊ ji roja 16 heta 19ê tebaxê ji bo vê komkujiyê şînê îlan dikin.

Ji bo li dij vê komkujiya hovana em berteka xwe nîşan bidin û bûyerê protesto bikin roja 18ê tebaxê(şemî) li bajarê Hannovera Almanya seet di 11an de meş û mitîngek protestoyê tê organîzekirin. Em wek rêxistin hemû êzdiyan û hemû gelê kurd vexwendî vê mêş û mitîngê dikin.

Silav û rêz!
16.08.2007

Meclîsa Federasyona Komeleyên Êzdiyan

Pêywendîdar

• Êrîşên hov dijî bihêz bûna gelê Kurd û divê deverên kutkirî vegerin ser îdareya Kurdistana azad

• Wezareta mafên mirovan û zanayên ola îslamê li Kurdistanê karên terorîst yên şengalê pirotsto kirin

• Mesûd Barzanî;"Bila gelê Kurd bi temamî ji bo rû bi rûbûna dijminan amade be"

• Neteweyên Yekbûyî , Amerîka, Brîtaniya û Kombenda Erebî êrîşan şermezer kirin

• “Divê baş bê zanîn ku ew axa ku bi xwîna şehîdan hatiye avdan, wê her ya Gelê Kurd be”

• "Bila dijminên Kurdistan baş bizanibin ku ev êrîşên hovane dê nikaribin pêşî li serxwebûna Kurd bigre"

• PSK, PWD û PDK-Bakur qetlîama Şengalê şermezar kirin

• Hevbendiya Demokratika Kurdên Bakur bi tundî vê kiryarê û fikr û ramanên kereyan gunehkar dike

• Daxuyaniya KURT-KAV

• FKKS: Em qetlîama li hember Kurdên Êzîdî bi tundî şermezar dikin

• Daxuyaniya Meclîsa Federasyona Komeleyên Êzdiyan

• DTP hedef referandûm e

Binivsîne | Biçe Jor

Hemû Naveroka Beşa Kurdistan

irêdan