Li Kurdistanê dengên DTP çima kêmtir bû?,24 Tîrmeh,2007 | Kurdistan

Bike Malpera Destpêkê | Têkîlî | Reklam 2007'an li Hemû Kurdistanîyan Pîroz Be!

ccccccccccccccccccccc

Cîh: Mal | Beşa Kurdistan/Rojev

Kurdistan/Rojev

Cîhan

Çand û Huner

Kurdistana Azad

Medyaya Kurdî

Zanist/Teknolojî

Aktuel /Jiyan

Aborî/Fînans

Nivîs/Lêkolîn

Dosyayên Taybet

Arşîw/Lêgerîn

Kunye/Rêvebirî

girêdan

Ji Weşanên HKMG

Malpera Dezgehî-Sereke a HKMG:hkmg.net

young team

Kurdistan / Rojev

girêdanên sponsor

Li Kurdistanê dengên DTP çima kêmtir bû?

NÛÇE-ANALÎZ: HESEN DILGEŞ / HAWAR DENGÛBAS

24 Tîrmeh,2007 weşandin:03:34:32 (GDK)

Li Tirkîye û bakûrê Kurdistanê bo hilbijartinên 22 Tîrmehê pêk hat.Di encama hilbijartinan de Kurdan piştî 16 salan ketin parlmena Tirkîyeyê.Kurd derîyeke nû nav rêbazên têkoşînê tevlî kirin.

24 namzetên Kurd wekî parlmenter hatin hilbijartin.AKP encameke dîrokî vergirt û ji %47ê dengan vergirt.CHP ku propagandaya kemalîzm û şovenîzmê dikir li gel hemû hewlên xwe yên provakatîf û dervey hiquqî xwe encax ji %20,partîya şoven MHP jî %14 deng vergirt û kete parlemenê.

CHP û MHP bi tevahî ji bakûrê Kurdistanê winda bûn û têk çûn.

Lê her çiqas kurd ketibûn jî parlemenê li hemberî encamê herkes matmayî ma.Ji ber ku DTP di vê hilbijartinan de encama herî xirab ya dîroka xwe stand.Partîyên tevgera siyasîya kurd ku tevlî hilbijartinan dibÛn di 15 salên dawîn de het di him di tevahîya kurdistanê de dengên xwe zede dikirin Û hejmara bajarên kurdan ku dibûn yekemîn di her hilbijartinê de zêdetir dibû.

• Di hilbijartinên 1995'an de HADEP di tevahîya Tirkîye ji %4,3 deng vergirti bû û 6 bajarên kurd de bû bû yekemîn

• Di hilbijartinên 1999'an de HADEP di tevahîya Tirkîye ji %4,8 deng vergirti bû û 10 bajarên kurd de bû bû yekemîn

• Di hilbijartinên 2002'an de DEHAP di tevahîya Tirkîye bi qasê 2 milyon ji %6,2 deng vergirti bû û 15 bajarên kurd de bû bû yekemîn.

• Di hilbijartinên dawî a 2007'an de DTP di tevahîya Tirkîye tevî dengên Ufuk Uras bi qasê 1.7 milyon ji % 4.1 deng vergirt û 5 bajarên kurd(Amed,Dêrsîm,Ixdir,Şirnex, Colemêrg) de bû yekemîn

Sedemên sereke ya zêde nebûn û kêm bûna dengên DTP

Sedemên sereke ya zêde bûna dengên AKP û

Zêdebûn li aliyekî dengên DTP li Kurdistanê pirr zêde nebe jî kêm bûn.Girseya ku berê dengên xwe didan DEHAPê pirr zêde ber bi AKP ve neçûn.Di hêleke din de jî li şûna ku CHP an jî MHP li Kurdistanê xurtir bibin AKP hê baştire. AKP piranî dengên partiyên din kişand cem xwe.Lê bi taybetî li Amedê gelek Kurd neçûn ser sindoqan û DTP protesto kirin.Di hin bajaran de dengê DTP zêde bûn,lê di gelekan de jî kêm bûn û AKP jî dengên bi avayekî pirr zêde zêde kir.Bi giştî sedemên sereke ya kêm bûna dengên DTP ewin ku hinek wan girêdeyî DTP ne;

1• Namzetên şaş:DTP namzetên ku bû bû sedema nerazîbûna gel diyar kir,gelek namzetên DTP şaş bû di serî de wek kesên Aysel Tugluk ku pesna Mîsaki Millî dikir.Gelek namzetên ji aliyê gel û raya giştî ve nedihat pejirandin hatin nîşan kirin.Êdî gel li gel hessasîyetên neteweyî rêvebirîyeke hemdem û profesyonek û nezî gel dixwaze.Ger tê xwstin ku gelê Kurd zêdetir xwedî li nirxên neteweyî derkeve divê êdî daxwaziyên gel jî cidî bê girtin.dinya diguhere,sîstem diguhere rewş çi be bila bibe.Bo bi bandor bûna ser gel divê hundirê daxwaziyên siyasî bi daxwazên gel bê tije kirin.Gelek namzetên DTP zimanê kurdî jî nizanî bûn.Bi taybetî hemû namzetên AKP ji bo ku bi gel re baş têkîlî deynîn namzeten Kurdî dizanin hilbijarti bû.Her wiha gel ji şexsiyetên di nava DTP jî bêzarin.Di nava DTP de kesên bi îstixrar nÎnin û tevlîhevî û alozîyeke mezin heye.Gel dixwaze mirovên cidÎ û serwe bibîne.(Derdora PKK heman tiştî di gelek waran de pêk tîne.Kurd neteweyeke bêdewletin û kurd bi zimanê xwe perwerde nabin.Lê ew çi dikin.rojnameyke Kurdî derdixin,lê ji alîye mîzanpajê de naşibe rojnameyeke.Malperek çê dikin ji alîyê dîzayn û naverokê de naşibe malperekê.Difikirin ku Kurdî ye bila bê xwendin. Di namzetan de jî heman tişt pêk anîn.Di vê serdemê de divê bo bal kişandin,piştgirî girtin,bi tesîr bûn a ser gel û bo kişandia ser Kurdewarîyê metodên hemdem lazim e.ji ber ku Kurd ne xwedî dewletin û alternatîfa her tiştî di dagirkeran de heye.Divê êdÎ her tiştê Kurdan heta asteke cazîptir bin.bo vê yekê delfet hene. )

2• Kêmasîya propaganda: DTP propagandeyek baş pêk neanî.Delfetên reklamê baş bi kar neanîn.Ji amadekirina mîtîngan heta çap kirina belavok,afîş û reklaman xebateke profesyonel nemeşand.Gelek derneg dest bi xebatan kir.Medya nehate bi karanîn, medyaya elektronîk nehate bikaranîn. Bo mîtîngan xebateke xurt pêk neanî û di hemû bajarên ku potansyela dengan heye pêk neanî.Dîmeneke dînamîk û xurt nîşan nedan.Baş birexistin nebû,bi gel re têkîlîyeke xurt pêk neanî,neçû hemû malan. Amedekariya DTP bo hilbijartinan bi afîş,belavokan ji amadekariyeke festîvaleke lawaztir bû.Kadroyên DTP ji gel dûr bû.Kolan bi kolan,mal bi mal neçûn.Gerek dikir ku bi eşîr û komên herêmî jî têkîlî bihata dayîn.Derket holê ku di vê serdemê de bi, bi kar anîna hemû delfetan xebat neye kirin êdî îqna kirina gel ne di mesleyên netweyî û ne jî di mesleyên din de ne mimkune.Kurd êdî di warê pirsên neteweyî de hişmend be jî ne be jî beyî xebat dengê xwe nade.

3• Di pirsgirêka Kurd de nezelalî: DTP polîtîkayeke vekirî nemeşand.Di pirsgirêka kurd de tiştên eşkere diyar nekir. Projeyke rûniştî pêşkeş nekir.Xalên zelal diyar nekir.(Wek "Emê bo perwerdeya Kurdî hewl bidin,"Emê bo otonomî,federalîzm,eyaleteke Kurd an jî herêmeke ,rêvebiriyeke taybet bo Kurdan bixebitin,"Emê bo rê li vebûna medyaya kurdî bi zimanê Kurdî ya bêsînor di bakûrê kurdistanê de bixebitin","Emê bo rakirina qedexeya ser navên mirov û cîhan yên bi kurdî hewl bidin","Emê bo bikaranîna kurdî di fermîyetê de hewl bidin" û hwd..li şûna wan "Gotina me bo Tirkîyeyê heye" gotin)

4• Pêknehatina bloka Kurd û xêza îmralî: DTP rê neda ku bo hilbijartinan blokeke Kurd ava bibe û bi HAK-PAR,KADEP û gelek derdorên Kurd re hevkarî çênekir û guh neda tu rexne û pêşniyarên ku Kurdên ji dervey derdora PKK.Gerek bû ku KADEP,DTP,HAK-PAR û hemû sazî,rexistin,komale û navendên Kurd bi yekrêzî tevbigerin û hêza siyasîya Kurdan xurtir bikin.Ger Kurd bi yekdengî tevbigeriya na dê Kurd hêzêke psîkolojîk jî bidest bixandin.Ji ber ku ketina partîyên Tirk bo meclîsa Tirkîye û ya Kurdan ne heman tişt e Kurdên ku xwedî nêrînên cûda bûn wek muxatap negirt û dev ji xêza îmralî berneda.Her wiha DTP guh neda tu rexneyên gel û nerazîbûnên gel di derbarê rêvebirîya DTP de berçav nehate girtin.Ji ber ku rêvebirî guh neda xelkê beralî kirina girseyan jî dijwartir bû.Her wiha hevkariya bi çepgirên tirk re ku di encamê de tu feyde neanî, jî bû nerazîbûna gel.

5• Bê projeyîya di problemên aborîde: DTP di problemên aborî de tu proje pêşkeş nekir.Di mîtîng û propagandayan de derbarê pêşxisitna rewşa aborîya Kurdistanê de tu pêşnîyar an jî daxwaz diyar nekirin.Tenê gotin aborî xirabe û birçî bûn heye.Tenê tespît kirin lê çareserî neanîn ziman.Divîya bû ku Kurdan bêjin encax herî zêde Kurd ango DTP dikare problemên me yên aborî dikere bîne ziman.DTP di propagandayên xwe de pir zêde negatîf-neyênî bû.Wekî CHP bê navber AKP sûcdar kir û her tim gilî û gazinc kir.Piraniya kurdan jixwe ji pirsgirêka kurd haydar in.Divîya bû problemên aborî ya gelê Kurd li bin banê pirsgirêka Kurd de bihataba yekxistin û gel problemên xwe yên nasnameyî û aborî di çerçoveyekê de bibîta.Kesên ji bo kêşeyên netweyî dengên xwe didan DTP jixwe dan divîya bû ku li vê girseyê bi waad û projeyên xitabî aborî girseya din jî bihataba kirin û bi vî avahî kesên ku ne xwedî hessasiyeta netweyî ne jî daxÎlî vê tevgere bihata ba kirin û vê girse jÎ hêdî hêdî pirsgirêken neteweyÎ têgihêşti bana.

6• Bê projeyîya di problemên civakî de: Di problemên civakî de tiştekî negotin.Diyar nekirin ku ka bo çarser kirina kêşeyên wek fuhuş,diz,dejenerasyona civakî,bêthemmulîya civakî ya li bakûrê Kurdistanê çi bikin.Her wiha di mijarên wek tenduristî,perwerde,binesazî û hwd. de proje û pêşniyarên wan tune bû..

7• Pisulaya yekgirtî: DTP weke partî tevlî hilbijartinana nebû û hilbijêr dengên xwe bo nazmetên sebixwe dan û ji ber ku gelek Kurd xwendinê nizanin pisulaya yekgirtî ya dengan jî bû sedema daketina dengên DTP.

8• Çûyîna Kurdan bo xebatê: Ji ber ku gelek Kurd bo xebatê di havînan de diçin bajarên tirkan û gelek Kurd jî diçin zozanan.Ev jî bû sebeba daketina dengên DTP.

9• Zextên dewleta Tirk: Di hin bajarên Kurdan de zextên dewleta Tirk,zextên hin partiyan ku hate zanîn di hin gundan de bi darê zorê bi zexta axayan,cerdevanan, leşkerên Tirk den dayina bo DTP hatiye asteng kirin û hin deveran de jî dengên DTP hatine dizîn.Lê neyê ji bîr kirin heman zextan heta zêdetir jî di hilbijartinên bihurî de jî hebû.

10• Tehdîta arteşa Tirk hemberî AKP: Di vê hilbijartinê de arteşa Tirk ku bi muxtireyeke midaxeleyî AKP kiribû hêrsa gelek kesan anî.Wek tê zanîn serfermandariya arteşa Tirk li himberî hikûmeta Erdogan "tehdîtnameyek" weşandi bû û hikûmeta Erdogan tehdît kiri bû. Li bakûrê Kurdistanê gelek Kurdên ku berê dengên xwe didan DTP an jî partiyên Tirkan li dijî vê midaxeleya artşeya Tirk xwestin ku piştgirîya AKP bikin.

11• Rewşa Aborî: Beşeke mezin ya kurdan bi taybetî kurdên ku berê jî dengê xwe nedidan DTP û didan partiyên yên din Tirkan di vê hilbijartinê de dan AKP.Bi taybetî dikandar û esnafan ji ber baştir bûna ekonomî û îstiqrarê dengên xwe dan AKP.Her wiha beşeke biçûk ya Kurdên ku dengê xwe didan DTP jî dengê dan AKP.Her çiqas hessasîyeta wana neteweyî hebe jî ji ber dirêj bûna têkoşîna rizgariya kurd hin kes eciz bûne û hessasiyetên wan a aborî derketîye pêş û baweriya wan bo têkoşina rizgarîyê nemaye.

12• Bê politikayî ya DTP di warê hessasîyetê Îslamî ya Kurdan de: Kurdên bakûrê Kurdistanê xwedî hessasîyeta olî ne.DTP politikayeke li gor vê yekê nemeşand.Piraniya Kurdan Misilmanin.Lê DTP tenê got em azadiya hemû olan diparêzin.Ma kalekî 60 salî ya ji gûndê Ferqînê çi ji vê gotinê fem bike.Di vê mijarê de bo zêdetir kirina hişmendiya gelê kurd ger pêwist bûya divîya bû kêm be jî siyaseteke populîst jî bihata ba meşandin.Divîya bûbehsa azadiya serpûşa jinan,perwerdeya dînî bikin,biçin mizgeftan û hwd.Divîya bû ku bi grubên olî ya Kurdan re têkîlîyeke germ û nêzîk deynin.Bi tenê serê xwe rojî girtin an jî nimêj kirin ne bibandor e.Lê DTP şûna bo bidest xistina mafên netweyî ya Kurdan hewl bide zêdetir politikayên xwe li dijî kevneşopiyên Kurdan û bi rastiyên hezar salî yên civakî ya Kurdan re hereket kir.Meseleyên ku piştî bidest xistina mefên bingehîn û neteweyî ya kurdan divîya bû bêne çareser kirin bi zimaneke xirabkar xistin pêşiya hemû tiştan.Modernzim,pêşketin,hessasiyetên civakî û nasnameya Kurd bi avayekî rêkûpêk lihevnekirin.Yanî mimkun bû ku girseke mezin ya kurdên ne xwedî hessasiyetên nasnameya Kurd in jî bi lihevkirina wan hemû hessasiyetan xwedî li nasnameyên xwe derkevin.Yanî girînge ku bi rêz girtin û derxistina pêş ya wan hessasiyan olî û civakî, bi hereket kirina li gor realite û pêşketina cîhanê û bi dest xistina mafên neteweyî ya Kurdan bi ahengî bêne praktîze kirin.

13• Nermtîya AKP: AKP dijeyatiya Kurdan nekir.Polîtîkayên AKP li hemberî Kurdan li gor hemû partiyên ku li desthilatdar bûne, nermtir û erênî bû û hin gavên biçûk jî avet.Ev yek jî bû sedem ku kurdên ku daxwazên wan ên netweyî ne gelek pêş de ye û dîtin ku AKP dikare hin tişan bike û tiştên AKP dike besin dengê xwe dan AKP.Her wiha asteng kirina li beremberî daxwaza opresyona leşkerî bo Kurdistana azad ya arteşa Tirk ji alîyê AKP ve jî sedemeke din a erênî bo AKP bû.

14• Serokkomarî û mexduriya AKP:Hin Kurd jî fikirîn ku AKP jî weke Kurdan mexdur û mezlum e.Ji ber vê yekê jî AKP dikare rewşa Kurdan baştir fam bike.Bi taybetî jî di mijara hilbijartina serokkomariyê de reaksiyonên hemberî AKP bû sedema vê hestê.

15• Xebatên xirab ya şaredariyên DTP: Xebatên şaredariyên DTP ku ne zêde serkeftî bûn bû sedema daketina dengên DTP.Bo şaredariyên DTP gilî û gazincên gelek zêde ye.gelek kes ji ber karên nebaş ya di nava şaredariyan ji DTP veqetiyan.Hinekan çûn nav refên AKP.Hemû kesên ku AKP veqetiyane an jî dengê xwe dane AKP ne asîmîle bûne.Gelek kes hene ku ji Kurdbûna xwe veneqetiya ne,Kurdîaxefin û girêdayî Kurdbûnê ne di nava AKP de cîh digirin.Yek ji sedema sereke ya vê yekê jî rewşa şaredariyên DTP ne.Di şaredariyên DTP de gelek îhaleyên cur bi cur de sextekariyên mezin têne kirin.Rexneyên gel bo DTP herî zêde ji ber xizmetên ne rêkûpêk û pêşketî,nerêzîya hemberî gel,sextekarî, torpîl,alîgirtin,dizî,rant,berjewendxawazî û bêrêtîye.

16• Medya û nekişandina Roj TV: Sedemeke din jî bêdelfetîya di warê medyayê bû.Ji ber asteng kirina Roj tv li bakûrê Kurdistanê DTP xwe negihand girseye mezin.Jixwe medyaya nivîskî û elektronîk a kurdî xitabî girseyeke biçûk û zana û hişmend û bibandor û birêvebir dike.

17• Hêz û reklamên AKP: AKP bi delfetên xwe yên mezin li her derê bakûrê Kurdistanê mîtîngên şanedar û bibandor pêk anî.Bi avayekî pêşketî li her cihê Kurdistanê birexistin bû û reklameke bibandor çêkir û çû gelek malan.Di bajarên Kurdan de afîş,poster,belavok û reklamên AKP ji DTP 10 car zêdetir bir.

18• Êrîşên PKK: Êrîşê demên dawî ya PKK bû sedem ku partiya şoven MHP bikeve parlementoyê û ji ber êrîşan pêşiya Kurdan di xebatên hilbjartinan de hate asteng kirin.

19• Pêşveçûna tevgerên Îslamî li Kurdistanê: Ji ber ku li Kurdistanê tevgerên îslamî ji nû ve pêş diçin û di serî de cemaata Fettulahçîyan bi avayekî pir xurt birextin dibe û dibistanan ava dike.AKP jî feydaya vê bilind bûna herketên îslamî bikaranî.

20• Baş îzah nekirina hîsa Kurdbûnê:DTP bi avayekî baş hîsa aîdîyetîya Kurdbûnê dernexist pêş,girîngîya bi destxistina mafên neteweyî û sîyasî ji bo milletekî baş îzah nekir.Bersiva pirsa "Çima divê ku mirov bo bidest xistin û pêşxistina maf û nirxên neteweyî jî têbikşe û ev yek cihê di jiyanê de çiqas girînge?" neda.Hîsa "Ez dikarim bi dest xistina mafên xwe yên neteweyî zêdetir pêşkevim û problemên xwe yên aborî û yên din jî çareser bikim.

21• Asîmîlasyon û entegre bûn: Derketiye holê ku di pêvajoya 4 salên dawîn beşeke din ya Kurdan asîmîle an jî entegre bûne. DTP jî bo rê li girtina li ber asîmîle bûna baş hewl neda ye.DTP girîngîya ku hewce dikir neda ziman û çanda kurdî û bi tesîra îmralî polîtîkayên kurdewar nemeşand.

22• Listikên AKP: AKP li hinek cihan de bi tehditan,bi waadên kar dayînê û bi belavkirina pere,xwarin, qerta kesk gelek Kurdan xepand.

23• Stratejîya şaş ya DTP ê giştî: Azad bûna neteweyekî tenê ne girêdayî problemên neteweyî yê. Netweyek tenê bi dîrok,çand,ziman û problemên xwe yên siyasî nayê îfade kirin.Netew her wiha bi aboriya xwe,ola xwe,bi nirxên civakî û bi gelek tiştên din pêk tê.DTP him di meseleyên siyasî de ne zelal bû û him jî problemên din qet bilêv nekir.Gelan di têkoşînên xwe de tenê bi girseya ku xwedî hessasîyeta neteweyî ne şer nakin.Li gel girseya ku xwedî hessasîyeta neteweyî ne,girseya ku xwedî hessasîyeta olî ne,girseya ku xwedî hessasîyeta aborî ne jî divê bê yekxistin û têkoşîn bê meşandin.

Divîya bû ne li şûna îdolojîya çepgirîyê ji bo Kurdên çepgir,rastgir,alîgirê PKK,ne-alîgirê PKK,Kurdên netewsperest,Kurdên lîberal,Kurdên dîndar, Kurdên karker,Kurdên Elewî,Kurdên ku federasyonê dixwazin Kurdên xwedî nerîneke cûda ne û hwd.. polîtÎka bihata bijartin.Ango DTP bi parastina îdolojiyeke nikare bibe partiyên Kurdan tenê dibe paritya beşeke Kurdan.Lê delfeta kurdan bo vê yekê nîne.Kurd li bakûrê kurdistanê ne xwedî dewlet an jî eyaletin ku wek partiyeke îdolojîk were hereket kirin.Divîya DTP bûya paritiya navnedîya Kurdan.Piştî bidest xisitna mafên bingehîn ya kurdan dibe ku Kurdan li bakûrê Kurdistanê partiyên cûda û îdolojîk jî avabikin.

Gelê Kurd ji Kurd bûna xwe veneqetiyaye.Bi dehan salin Kurd gelekî berdel dan.Gelek westiyan. Lê hedef pêk nehat.Lê piranî hê jÎ girêdayî eslê xwe ne.Xwedî hessasîyetên kurdewarî ne jî.Lê êdî Kurd ji bo ku bijî,ji bo nifeşek nû yê baş pêk be û bihêz be û weke mirov bijî dixwaze ku li gel pirsgirêkên neteweyî problemên xwe yên din jî bê çareser kirin.Dixwaze ku hemû daxwazîyên wî bê dîtin.Hemû hessasiyetên wî bê fem kirin.Wê demê têkoşîna bo nirxên neteweyî jî watedartir be.Gelê bakurê Kurdistanê hê jî amadeye ku piştgirîyê bide tevgerên xwe yên siyasî.Ger partiyeke Kurd ya xwedî perspektîfeke xurt,xwedî projeyên eşkere him di warê pirsgirêka Kurd de û him jî di problemên aborî û civakî û rojane de,xwedî kadroyên pêşketî,profesyonel,rast û dirust,nêzî gel,bê dêk û dolab,xwedî biryarên li gor daxwaza îredaya Kurdan,xwedî hestiyarîya olî û nirxî, xwedî politikayên Kurdewar û heman demê de serbilind û heman demê de hevgirtî û heman demê de ne-kemalîst,ne bêserûpê ,xwedî zimaneke vekirî,eşkere, zelal û nêzî zimanê gel û bi her avahî cidî û xwedî metodên modern û pêşketî û xwedî namzetên nêzî gel,ji nava gel,gor daxwaza gel,bi tecrube û cidî û ji karên qirêj,ji dizî,ji sextekarî,ji bêhurmetî,ji dêk,dolab,fesadî,berjewendxwazî dûr û xwedî biryarên birûmet û nêzî gel û dûrî şer û nakokÎyên navxwe hwd.. di holê de bûye piraniya Kurdên ku dengê xwe dane AKP wê bidana wê partiyê.Lê li hemberî zimanê zelal û nêzî gel,nêzî nirxên olî û sosyal û însanî,hêz,profesyonelî, çalakî,bi biryarî û propganda û xebata xurt ya AKP partiyeke kurd tune bû ku Kurdên ku dengê xwe dane AKP dengên xwe bidana wê partiyê Kurd.

Ger partiyeke Kurd û Kurdewar ku xwedî taybetmendîyên teknîkî û kadroyî û hestîyarî(olî,aborî û sosyal) û mirovî û zelalîya zimanî û wêrekî de evkêşî AKP hebûya bê guman Kurdan wê li şuna partiyeke Tirk dengê xwe bidana wê partiye Kurd.

Dibe ku hin sedemên din jî hebin an jî sedem kêmtir bin.Divê di serî de DTP ,hemû tevgera siyasîya bakûrê Kurdistanê û Kurdên perçeyên din jî wan encaman baş analîz bikin û pêşaroja Kurdistanê hin zêdetir nexin xetere û destkeftîyên heyî jî ji holê ranekin û berî hemû Kurdên bakûrê Kurdistanê asîmîle bibin hemû mafên netweyî ya Kurdên bakûrê Kurdistanê bêne bidestxistin.(HAWAR DENGÛBAS)

Binivsîne | Biçe Jor

Hemû Naveroka Beşa Kurdistan

irêdan