Orhan Dogan li gel hezaran hate defîn kirin ,02 Tîrmeh,2007 | Kurdistan

ŞIRNEX,bakûrê Kurdistanê -- Orhan Dogan li Cizîrê bi merasîmeke bêhempa hate definkirin. Beriya definkirinê li ber avahiya DTP’a Cizîrê parlementera DEP'ê ya berê Leyla Zana axaftinek kir û wiha got: "We ew bi awayekî serbilind ji bo Kurdistanê kir zava."

Cenazeyê Parlementerê DEP'ê yê berê û têkoşerê azadiyê Orhan Dogan pêr di saetên serê êvarê de gihişte Navçeya Cizîra Şirnexê. Li vir ber bi Qada Otogarê ve meşek ku bi sed hezaran kes beşdar bû hate lidarxistin. Di dema meşa 2 saetan dom kir de ji ber zêdebûna girseyê car car îzdîham çêbû. Beşek girseya li qadê cih nebû bi neçarî derkete ser Bedenên Cizîrê. Di dema meşê de bênavber slogana, "Rêhevalê Rojê nemir e", "Anîna aştiya me bi te re hêviya wê dikir deynê me yê namûsê ye" hatin avêtin û pankarta gotina Orhan Dogan a wekî, "Anîna aştiyê ya Tirkiyeyê deynê me yê namûsê ye" li ser nivîsî ya mezin hate vekirin.

KEÇA WÎ AYŞEGUL AXIVÎ

Keça Orhan Dogan a mezin Ayşegul Dogan di torenê de axaftinek kir û wiha got: "Kedeke mezin a bavê min li ser vî gelî û li ser me heye. Em ji wî re deyndar in. Dayîna vî deynî dijwar e. Serê gelê me sax be. Ew şehîdê vî gelî ye."

Piştî Ayşegul Dogan, Parlementera DEP'ê Leyla Zana bi kurdî axaftinek kir û bal kişand ser jiyana rûmetdar a Orhan Dogan. Zana ev tişt gotin: "Roj hene mirov cejnê pîroz dike. Roj hene mirov şînê dike. Divê em di cejnê de cejn û di şînê de jî şîn bikin. Me îro zarokê Kurdistanê bi awayekî serbilind anî hizûra we. Ew her tim ji bo vî gelî xebitî. Her tim digot, 'Di dema têkoşînê de ez her tim 24 saetên rojê 4 saatan radizêm û 20 saetan dixebitim. Ez ji bo keda xwe bidim gelê xwe vê yekê dikim. Lê ev yek jî ji min re kêm tê. Xwezî rojek ji 24 saetan zêdetir bûya'. Îro we Orhan Dogan bi awayekî serbilind ji bo Kurdistanê kir zava. Orhan her tim ji bo aştî û biratiyê hewl dida. Ne mimkûn e ku ez Orhan bi du peyvan ji we re bêjim. Wî tu caran peyva ez bi kar neanî. Her tim 'gelê min' got. Her tim soz da gelê tirk û Kurdistanê û ji bo azadiyê têkoşî. Berî niha we cizîriyan Orhan kir parlementer. Lê îro ji Serhedê heta Botanê her kes Orhan wekî wekîlê xwe dibîne. We ev xelat da Orhan. Lazim e hûn xwedî li vê jî derkevin. Ez îradeya vî gelî baş dizanim. Ez dizanim ka dê kî çawa bîne ku derê. Dostên rêhevalê min ê rêzdar, hûn hemû xêr hatin. Ew kesek her tim pêşiya xwe didît. Her tim digot ez dê jiyana xwe fedayî aştiyê bikim. Heta peyva xwe ya dawiyê di aştiyê de israr kir. Hêviyeke wî ya wiha mezin jî ji dostên wî hebû. Aştî bi kedê tê. Rêhevalê me ev ked da û canê xwe jî da. Em îro li diyarê Mem û Zînê wî bi awayekî bêhempa rê dikin. Ez bejna xwe li ber hemû dostan ditewînim. Serê we hemûyan sax be."

BÛ MÊVANÊ EVÎNDARAN

Piştî axaftinan girseyê careke din bênavber sloganên, "Şehîd namirin", "Ocalan" avêtin. Her wiha di dema torenê de slogana, "Baykal dê hesabê bide" jî hatin avêtin. Piştre cenazeyê Dogan ji bo definkirinê birin Goristana Asrî ya li pişt Tirba Mem û Zînê. Dogan li goristana malbatê ya ku dayik û bavê wî lê hate veşartin.

KONÊN SERSAXIYÊ

Bi boneya sersaxiya Orhan Dogan li Cizîrê konên sersaxiyê hatine vekirin û malbata Dogan li vir sersaxiyan qebûl dikin. Her wiha li gelek deverên din ên bakurê Kurdistanê ji bo Dogan sersaxî li avahiyên DTP’ê têne qebûlkirin. Namzetê Serbixwe yê ‘Hezar Hêviyan’ ê Edenê Nazmî Gur navê Orhan Dogan li bûroyeke xwe ya xebatên hilbijartinê kir.

Turk îro sersaxiyê qebûl dike

Namzetê Serbixwe yê Parlementeriyê yê ‘Hezar Hêviyan’ yê Mêrdînê Ahmet Turk, ji bo siyasetmedarê kurd û parlementerê berê yê DEP’ê Orhan Dogan ê jiyana xwe ji dest dabû, îro dê li avahiya DTP’a Qoserê serdanên sersaxiyê qebûl bike. Turk ku vekirina bûroyên hilbijartinê yên Dêrik û Şermexê betal kirin, wê îro ji Cizîrê vegere Mêrdînê. Turk, ji sibê de wê ji ber şîna 3 rojî ku hatiye îlankirin, li avahiya DTP’a Qoserê serdanên sersaxiyê qebûl bike. (Dîha)

Binivsîne | Biçe Jor

Hemû Naveroka Beşa Kurdistan

irêdan

Dezgehî: hkmg.net | Hawar Kurdistan Media Group | Agahîyên Giştî | Rêvebirî | Reklam Dayîn

Web Development by HKMG.Hawar Kurdistan Soft Ser Navê HKMG Xwedî û Damêzrêner Serhad B.RÊNAS

Weşaneke