Tirkên har ser Kurdan hewla qetlîamake pêk anîn, hikumeta AKP wekî her carê temaşe dike

Bike Malpera Destpêkê | Têkîlî | Reklam

ccccccccccccccccccccc

Cîh: Mal | Beşa Kurdistan/Rojev

Rûpela Serî

Kurdistan / Rojev

Navneteweyî

Çand û Huner

Zanist / Teknolojî

Medyaya Kurdî

Nivîs / Lêkolîn

Aktuel / Jiyan

Aborî / Fînans

Kurdistana Azad

Dosyayên Taybet

Dîmen / Video

Wêne

Rewşa Hewa

Xaçepirs

Karîkatur

Interaktîf

girêdan

Tirkên har ser Kurdan hewla qetlîamake pêk anîn, hikumeta AKP wekî her carê temaşe dike

30 Nîsan (Avrêl), 2008 weşandin:02:23:15 (GDK)

AMED , bakûrê Kurdistanê -- Li Sakaryayê di encama êrîşa nîjadperestan a li hemberî çalakiya kurdan de, kesek jiyana xwe jidest da, gelek kes jî birîndar bûn. Waliyê Bajêr ji êrîşa ku 6 saet dom kir re got 'bûyerek biçûk e'.

Midûrê Ewlehiya Sakaryayê Faruk Unsal jî dema DTP'yî ji salona dawetê dihatin derxistin got ku 'wê ev girse bi saxî û selametî bighîje mala xwe'. Lê wesayîtên ku DTP'yî tê de bûn jî rastî êrîşê hatin. Camên wesayîtê hatin şikandin, 2 kes jî birîndar bûn.

Ji bo Şahiya Çand û Hunerê ya ku Rêxistina DTP'ê ya Sakaryayê ev çend roj in bi şîara 'Aştî û Biratî' lidar xist, çend roj in amadekarî dihatin kirin. Şahî, li Salona Dawetê ya Funda pêk hat. Parlementerê DTP'ê yê Rihayê Îbrahîm Bînîcî jî di nav de ji hezar û 500'î zêdetir kes şevê din ji saet 18.30'an de li salonê civiyan.

Lê dema ku wê şahî destpê bikira, komek nîjadperestên ku hate diyarkirin endamên Alperen Ocagi ne, li derve kom bûn û dest bi sloganên li dijî kurdan, kirin. Parlementer Bînîcî telefonî Waliyê Sakaryayê Huseyîn Atak re hevdîtin çêkir û xwest ku li hemberî nîjadperestan tedbîr bêne girtin.

Walî bersiva "bûyerek biçûk e em ê belav bikin" da Bînîcî. Polîsan mudaxeleyî bûyerê nekir û di demeke kin de komên din ên nîjadperest jî li cihê bûyerê civiyan û dest bi êrîşa bi kevir a li hemberî salonê kirin. Di encama êrîşê de camên salona dawetê şkestin, çend nîjadperest jî xwestin bikevin salonê û DTP'yiyan lînc bikin. Derdora avahiyê ji aliyê nîjadperestan ve hate dorpêçkirin, lê polîsan tenê li daketina salonê barîkat danî.

Polîs temaşe kir

Wesayîta ku hunermendên Navenda Çanda Mezopotamyayê (MKM) tê de bûn jî rastî êrîşê hat. Hunermendê bi navê Yunus Ruzgar ku di wesayîtê de bû, da zanîn ku bi polîsan re ji salonê derketine û wiha dom kir: "Em bi polîsan re bi rê ketin. Lê piştî demeke kin, nîjadperest bi wesayîtên xwe li dû me hatin. Mîna ku hertişt plankirî be. Vê car jî dest bi avêtina keviran kirin. Polîs 'qaşo' ewlehiya me pêk dianî, lê bi tu awayî mudaxele nedikir. Çêr bi me kirin, camên wesayîta me şkandin. Wesayîtek ku plaqeya wê 54 PU 976 bû û tê de nîjadperest hebûn, her tim tehrîq dikir."

Midûriyeta Ewlehiya Sakaryayê, teşebusa lîncê ya ku faşîstan li hemberî kurdan lidar xist û kesek hate qetilkirin, di malpera xwe ya înternetê de wek “Protestoya xizmên şehîdan a li hemberî DTP’ê” nîşan da. Di nûçeyê de hate diyarkirin ku li navçeya Karapurçekê 2 otobus hatine kirêkirin, ulkucî lê hatine siwarkirin û li navenda Sakaryayê hatine danîn. Li gorî nûceyê, ji berê de hatiye zanîn ku dê DTP vê şahiyê li dar bixe.

Parlementerê DTP'ê yê Rihayê Îbrahîm Bînîcî, diyar kiribû ku di bûyerên şevê din qewimîn de polîsên girêdayî Midûriyeta Ewlehiya Sakaryayê ulkucu belav nekirine, tenê li wan temaşe kirine. Bînîcî, gotibû ku êrîş bi saetan dom kiriye, Waliyê Sakaryayê Huseyîn Atak jî gotiye 'rawestin, em ê belav bikin' lê mudaxele nekirine û kesek jiyana xwe jidest daye.

Bînîcî, da zanîn ku nîjadperestan xwestiye provakasyon derxin, lê ji hezar û 500'î zêdetir kesên beşdarî şahiyê bûne, bi awayekî aqlêselîmî nehiştine ku ev provakasyon pêk bê. Bînîcî wiha dom kir: "Girseya me li me guhdarî kir. Gotin ku wê bi tu awayî nehêlin provakasyon derkeve. Me pêşî li bûyerek mezin girt. Girseya me wiha aqlêselîm nebûya, wê ev der bibûya dojehek. 6 saet, girseyê bi gotina me kir. Walî û Midûrê Ewlehiyê, her wiha hêzên ewlehiyê jî, di vê mijarê de bihîstyar nebûn. Herwekî girseya li derve, tehrîq kirin." Bînîcî, da zanîn ku Midûrê Ewlehiya Sakaryayê Faruk Unsal jî dema DTP'yî ji salona dawetê dihatin derxistin gotiye 'wê ev girse bi saxî û selametî bighîje mala xwe'. Bînîcî, wiha got: "Ji me re gotin 'me tedbîr girtin', lê wesayît rastî êrîşê hatin û 2 kes birîndar bûn. Xuya ye ku hertişt organîzekirî ye. Em ê piştperdeya vê bûyerê lêkolîn bikin. Di encama vê êrîşê de rêhevalek me yê 65 salî şehîd ket."

Cenazeyê Ebubekîr Kalkanê ku faşîstan qetil kir hate veşartin

Cenazeyê Ebûbebîr Kalkan ê 65 salî ku li Sakaryayê di encama teşebûsa lînçkirinê ya li hemberî DTP'yiyan de krîza dil derbas kir û jiyana xwe jidest da, li Sakaryayê hate definkirin.

Cenazeyê Ebubekîr Kalkan ê 65 salî ku ji Navçeya Qerqeliya Wanê ye û krîza dil derbas kir û jiyana xwe jidest da, ji bo ku sedema mirina wî bê zelalkirin, şandibûn Saziya Tiba Edlî ya Stenbolê. Hevseroka DTP'ê Emîne Ayna û rêveberên Navenda Giştî ya DTP'ê jî beşdarî merasîma cenaze bûn.

DTP: Dewlet naxwaze kurdan biparêze

Êrîşa ku li hemberî şahiya ‘Aştî û Biratiyê’ ya ji aliyê DTP’a Sakaryayê ve hate lidarxistin pêk hat û bû sedema mirina kesek, hate şermezarkirin. Alîkarê Hevserokên DTP’ê Mustafa Sarikaya, diyar kir ku dewlet li hemberî êrîşan bi xweşbînî tevdigere û tedbîran nagire. Sarikaya hişyariya “Em banga aqlêselîmiyê li gelê xwe dikin. Lê ger ku êrîş bidomin, wê tu kes nikaribe pêşî li hawira kaosê (tevlihevî) bigire” kir. Sarikaya, diyar kir ku çalakî ji berê ve hatiye plankirin, destûrên pêwîst hatine girtin û tedbîrên ewlehiyê ku kêm hatine girtin, rexne kir. Sarikaya, diyar kir ku hesasiyeta ew di hêla pêvajoya Tirkiye tê de ye de nîşan didin, ji aliyê dewletê ve tê piştguhkirin û wiha dom kir: “Em dibêjin ku hin derdor, dixwazin me ber bi riyeke cuda ya siyasî ve bikişînin û mudaxeleyî pêvajoya ku em dixwazin pêk bê, bikin. Em dibînin ku dewlet di vê mijarê de tedbîrên cidî negirtiye, digel ku parlementerên me li wir bûye, bi sedan mirovên me di hundir de asê mane, tedbîrek cidî nehatine girtin, mudaxele nehatiye kirin, bi vî awayî, li hemberî vê keriya qetilan xweşbînî nîşan daye.”

Dewleta Tirk êrîşan fît dike

Bi hemane bi bilind bûna êrîşkariya dewleta Tirk ser gelê Kurdistanê û êrîşên ser Kurdistana azad. Li bajarên Tirkan êrîşî Kurdan tên kirin, malên Kurdan tên şewitandin, malên Kurdan tên talan kirin, saziyên kurdan tên xêra kirin, heqeretên bê dawî li Kurdan tê kirin.

Li dewleta Tirk bi taybetî bajarên Tirkan ku xwedî nifuseke zêde ya Kurdan in , êrîş û zextên Tirkên faşîst jî bi hevlariya medyaya Tirkî zêde bûn. Dewleta Tirk ku bi dehan salan di şereke ne mafdar ya dijî têkoşîn a azadiyê ya Kurdan dimeşîne û di pêvajoya dawî de jî li beramberî yekreziya Kurdan di warê dîplomatîk û rastiya kurd û Kurdistanê de careke din kete tengasiyê niha tirkên ku ji aliyê dewleta Tirk ve bi dehan salin bi înkara gelê kurd hatine xepandin bi hestên şovenî êrîş û talana gelê kurd dikin.

Provokasyon û tahrîkên ku bi pêşengiya nijadperestan ve tên kirin, beşên ewlekariya dewletê li dijî van êrîşan bêdeng dimînin. Avahiyên dezgehên Kurdan tên talankirin û li gelek cihan hewldanên lîncê û êrîşên çêkdarî pêk hatin. Bi van hewldanan û bêdengiya dewletê Tirkiye ber bi şerekî navxweyî ve diçe. (HAWAR DENGÛBAS / Dîha, ajansan)

NAVGÎN: Binivsîne | Biçe Jor | Bike Ekrana Mezin - Derkeve

TOMAR BIKE:

Ev çiye?

RÛPELA BEŞÊ: Hemû Naveroka Beşa Kurdistan

girêdanên sponsor

newspaperturkiyelebçe, amed, paytext, diyarbekîr, halabja, şano, diyarbakir, welat, azadiya welat

Nûçeyên din ji beşa Kurdistan

Girêdanên sponsor Ev çiye?