HAWARDENGÛBAS | Berxwedana gel li dijî hêzên mîlîtarîst rewa ye!

Ev hefteyek e, li bakurê Kurdistanê hêzên militarîst êrîşê xelkê me dikin. Li dijî vê zulm û zordariya leşker û polisan xelk jî liberxwe dide. Heta nuha 14 kes bi çekên hêzên dewletê şehîd ketin. Sê ji wan zarok in. Zarokên sê salî, şeş salî, neh salî… Ev wahşet e, tenê rejîmên dîktator, otorîter karin wisa dikin.

Medya Tirk bi derewan rastiya bûyeran bermeqlûbî dike û dixwaze Kurdan gunehbar nîşan bide. Kar û îşê televizyon û rojnameyên Tirkan ev e, dibêjin: „Kurd terorê dikin“. Navê pkkê bikartînin. Ev jî xapandine. Tiştê tê kirin, karekî psîkolojîk harekatê ye, propaganda ye, dezinformasyon e.

Kes napirse, nabêje! Kîjan dewlet dikare zaroka sê salî bikuje? Kîjan dewleta hiqûqê dikare gule berde zarokan ? Di kîjan demokrasiyê de hatiye dîtin ku leşker û polis çek û sîlah bi ser xortan re bireşînin! Vaye Fransa, çend kes hatin kujtin?

Dezgehên dewleta Tirk û medya ser û mejiyê me tevlihev dikin û nahêlin rastî bên dîtin. Hiqûq û siyaseta demokrat vê emir dike: dewlet jibo cîbecihkirina edaletê heye, dewlet berpirsiyar e di ber parastina mafan de. Mafê yekemîn mafê jiyanê ye. Dewleta Tirk zarokan dikuje, zarokên bê guneh! Dewsa ku jiyana wan biparêze, wan dikuje.

Ma mitralyoz di destê van zarokan de hebû, ma van zarokan bi tank û topan êrîşê dewletê dikirin? Na! Ev dewlet, ev rejîma Kemalîst qatilê zarokên me ye. Bila kes li hucetan negere, divê em ji vê derê dest pê bikin. Ev rejîm qatil e, xwînrêj e, destê wê di xwîna zarokên me de ye! Dewlet mecbûre jiyana zarok û xortên derkevin numayişan jî biparêze. Rayedarên dewletê dibêjin, tiştên ne yasayî kirine. Eger wisa be jî dewlet mecbûre mafê jiyana zarokan biparêze. Hela li halê Serokwezîr Erdogan binêrin, dibêje: „zarok û xortên ku dijê yasayan derkevin, dê hemî tişt bi serê wan bê!“ Paydos bay Erdogan! Em dizanin tu ji tirsa generalan bizdiyayî. Lê ew qasî jî nabe! Bi van gotinan destmêja lîberalî mîberaliyê hemî dişke, qet ti hêjayîyekî bi mirov re namîne. De here, ji xwe re berî her tiştî hinekî dersa mirovayetîyê, hiqûqê, edaletê werbigre. Eger insanekî adil nebe, nikare bibe demokrat.

Bes e êdî. Tirkan navê pkkê jî di devê xwe de kirine wek benîşt, dicûn û ha dicûn. Doza Kurd û Kurdistanê ne pkk ye. Eger pkk be, va ye serokê pkkê di destê wan de ye, ji wan bêhtir Kemalîzmê diparêze, ji wan bêhtir neteweperweriya Kurdan reş dike û ji wan bêhtir dijminahiya dewleta Kurdistanê dike. Mesele ne pkk ye, ne jî Abdulah Ocalan e.

Derd û kulê rejîma Kemalîst bi temamî doza Kurdistanê ye. Li herêmê konjonturek baş ji bo Kurdan peyda bûye. Şansê gelê Kurdistanê heye, bibe xwedîyê dewletekê. Rejîma Kemalîst dixwaze pêşiya vê bigre. Ne tenê ew, Îran, Suriye û rejîmên Ereb jî li dijî guherîna statûqoya herêmê ne. Tirkçiyan plan û provokasyon ji bo vê yekê amade kirine û dixwazin gav bi gav bi cîh bikin. Armanc pêşîlêgirtina geşbûna doza Kurdistanê ye, bi taybetî jî têkdana damezirandina dewleta Kurdistanê ye. Rejîma Kemalîst hemî hesabên xwe li ser vî esasî çêkiriye. Carna hesabê wan bi avê re diçe. Carna jî bi ser dikevin.

Li Şemzînan plana wan têkçû, di Newrozê de jî bi ser neketin. Lê di bûyerên vê dawiyê de mixabin hinekî bi wan re derket, hesabên wan piçekî meşiya. Aşkereye ku hin kes, belkî jî hêz di nav û derûdora pkkê jî hene ku di van provakasyonan de rolekî xerab dilîzin. Nuha em naxwazin zêde bi vê meseleyê ve dakevin. Jiber ku dijmînên Kurdan dixwazin carek din Kurdên welatperwer bera hev bidin. Em divê şiyar bin. Îro roj berî her tiştî hewceye em li şehîdên xwe, brîndarên xwe, zindaniyên xwe xwedî derkevin, leyistikên dewleta Tirk aşkere bikin. Lê bi hevokekê be jî em dixwazin bangî xuşk û birayên xwe yên dilsoz û welatparêzên dora pkkê jî bikin: Divê em li plan û provokasyonên dewleta Tirk û yên din şiyar bin û divê em mil bi mil bi hevre planên Kemalîstan têkbidin. Ji me re dewletek Kurdistanê pêwist e, ji me re neteweperweriyeke demokrat, niştîmanperweriyeke humanîst pêwist e. Ji me re hevahengî û hevxebatek Kurdistanî pêwist e. Siyasetek wisa dê bibe bersiva xwîna kulîlkên berxwedana doza Kurdistanê.

7 Avrêl 2006

Hemû Mafên Vê Nivîsê ya Peyama Kurd e.