HAWARDENGÛBAS | Çîyayêreş bû dewlet em 40 mîlyon hin mane bê dewlet

Pey şerê cîhanê yên yekemîn û duwemîn pir gel bûne dewlet, Kurd jî di nav da gelek jî nebûne dewletên serbixwe. Bi giştî hin sebebên ji gelên îro hin jî bindest in bi xwe bûn, lê piranî rewş û berjewendîyên dewletên mezin yên pey şerê serketî bûn, ewana wî çaxî xwedî biryar bûn. Ewana jî bi bazarên nav xwe li ser masê xet û sînor kişandine nav gelan. Piranî wan gelan di nav xwe da parve vekirin.

Lê daxwaz û tekoşîna bo rizgar kirina welat tu caran di nav gelan taybetî di nav me Kurdan da neskinî.

Pey ji hev ketina welatên Sovyatan pir gel gihîştina mirazê xwe. Piranî jî ne wek Kurdan xwîna xwe rêtibûn ne jî ji bo azadîyê karek usa bê dawî ajotibûn. Bes şert û mercên dinyayê li wan hat, ewana jî jê îstifade kirin û dewletên xwe avakirin. Ji wana dewletên serbixwe ya dawîyê jî bi mistek erd û însanên xwe va ( Montenegro ) Çîyayêreş bû. Bi rapirsînê va bê şer û dew bû dewlet. Lê em 40 mîlyonê pirtir Kurd hin jî bê dewlet in.

Belê îro Kurdisatana Başûr bi temamî nebe jî ji van derfetên dawî sûd vergirt û nuha jî ber bi azadîyên firehtir gav davêje.

Kurdên parçên din jî hêdî hêdî ji nimûneya Başûr dersan distînin û kar dikin ku tevgera xwe ber bi konaxek pêş bixînin. Ango di xwe nebawerbûna Kurdan da tîşkên mezin çedibin, rikberîya nava me hêdî hêdî radibe. Heke em hin dıwarên me bi xwe di nav xwe da jenîye hilweşînin, em bi xwe tev gel di bin bandora dewletên dagîrker û xwefiroşan piçek jî derxin, wê rê bi giştî ber me vebe. Eger beşeke din ya welat parçek piçûk be jî azad bibe êdî di seranserê Kurdistanê da em dikarin gav bavêjine ber bi dewletek serbixwe û demokratîk.

Heta çend sal berê ev desketinên Başûre welat jî bo me xeyal bû. Lê îro pêştaçûna Başûr, rewş û rûçikên guhurîna cîhanê edî nêzik nebe jî yekbûn û serbestîya giştî ya Kurdistanê nêzik dike.

lê gor min Kurdistan mezin êdî ne xeyalek usa ji me gelek dûr e. Bes divê êdî em pîyê hev na, destên hev bigrin da ku ew bihûşta ser erdê nêzikê xwe bikin.

Dema meriv bi giştî tevgera Kurdan çi welat çi dervayî welat mêzedike. Hewldanek, livek xweşbîn û bîhnek dilgeş gor dewr û dewranên berê jê tê. Lê dîsa jî gelek asteng û dîwar li pêşîya me sekinîne. Ew jî dimîne ser Partîyên Kurdistanî û gelê me ku wan kelem î pîjan ji ortê rakin, rê li ber tekoşeran xweş bikin.

Bi kurtî Kurdistana mezin wek berê xeyaleke xam nîne, lê dîsa jî hin negihîştîye ku em fêkîyên wê di van nêzikîyê da tam bikin.

Bi hevîya wana rojan!